aaj tak dida-e-mushtaq se pinhan hi rahe

aaj tak dida-e-mushtaq se pinhan hi rahe
ye alag baat wo nazdik rag-e-jaan hi rahe
aur honge jinhen milta hai sukun-e-khatir
hum teri bazm mein aa kar bhi pareshan hi rahe
ek faqat bazm-e-nigaran hi pe mauquf nahin
hum sar-e-dar bhi ai dost ghazal-khwan hi rahe
ye bhi mumkin hai koi aae sar-e-rah-e-wafa
ye bhi mumkin hai mere baad ye viran hi rahe