aap apne ko moatabar kar len

aap apne ko mo'atabar kar len
milne walon ke dil mein ghar kar len
zindagani ke din jo thode hain
kyun na hans bol kar basar kar len
chun rahe hain jo aib auron ke
apne daman pe bhi nazar kar len
kaun deta hai sath mushkil mein
hauslon hi ko ham-safar kar len
chahiye kuchh sukun duniya mein
khwahishen apni mukhtasar kar len
baat pahunche kisi tarah un tak
hum sitaron ko nama-bar kar len
jangalon se hamein guzarna hai
pahle sanpon ko be-zarar kar len
chaliye jadugaron ki basti mein
apne aibon ko bhi hunar kar len
aao dukh dard bant len 'ejaz'
ranj-o-gham ko idhar-udhar kar len