ab kahin saya-e-gesu bhi nahin
chain dil ko kisi pahlu bhi nahin

jaane kya soch ke khush baitha hun
mausam-e-gul bhi nahin tu bhi nahin

ab teri nazr karun kya ai dost
ab meri aankhon mein aansu bhi nahin

kis ko sine se laga kar roen
dasht mein ab koi aahu bhi nahin

muskura uthti thi wo aankh kabhi
aur ab jumbish-e-abru bhi nahin

dil ko hasrat hai tere milne ki
aur haalat pe qabu bhi nahin