ajib KHauf hai jazbon ki be-libasi ka

ajib khauf hai jazbon ki be-libasi ka
jawaz pesh karun kya main is udasi ka
ye dukh zaruri hai rishte khala-pazir hue
ada hua hai magar qarz khud-shanasi ka
na khwab aur na khauf-e-shikast-e-khwab raha
sabab yahi hai nigahon ki be-harasi ka
koi hai apne siwa bhi masafat-e-shab mein
sahar jo ho to khule raaz khush-qayasi ka
wo sail-e-ashk simatne laga hai sheron mein
jise mila na koi rasta nikasi ka