aqab se war tha aakhir main aah kya karta
kisi bhi aad mein le kar panah kya karta

gharib-e-shahr tha aankhon mein thi ana zinda
saza-e-maut na deta to shah kya karta

mere khulus ko jo sikka-e-gharaz samjha
main aise shakhs se aakhir nibah kya karta

yun us ke afw ka daman bhi dagh-dar na ho
yahi khayal tha qasd-e-gunah kya karta

ye tar tar shab-o-roz reza reza hayat
main apne haal par aakhir nigah kya karta

jo zindagi se na pae najat ki rahen
'shakil' us ko zamana tabah kya karta