ba-zahir ye jo begane bahut hain
hamare jaane-pahchane bahut hain

khirad-mando mubarak azm-e-aflak
zamin par chand diwane bahut hain

shabistanon se tum niklo to dekho
bhare shahron mein virane bahut hain

tumhaara mai-kada tum ko mubarak
hamein yaadon ke paimane bahut hain

gila kya ghair ki beganagi ka
ki jo apne hain begane bahut hain

nizam-e-zist ka mehwar mohabbat
haqiqat ek afsane bahut hain