badan ke luqma-e-tar ko haram kar liya hai
ki khwan-e-ruh pe jab se taam kar liya hai

batao udti hai bazar-e-jaan mein khak bahut
batao kya hamein apna ghulam kar liya hai

ye aastana-e-hasrat hai hum bhi jaante hain
diya jala diya hai aur salam kar liya hai

makan ujad tha aur la-makan ki khwahish thi
so apne aap se bahar qayam kar liya hai

bas ab tamam ho ye wahm o e'tibar ka khel
bisat ulat di sabhi sara kaam kar liya hai

kisi se khwahish-e-guftar thi magar 'saqib'
wufur-e-shauq mein khud se kalam kar liya hai