badi dilchaspiyon se subh-e-sham-e-zindagi hogi
main dekhunga unhen aur sari duniya dekhti hogi

kuchh aise dard se furqat mein main ne hath uthae hain
dua bhi kaamyabi ki duaen mangti hogi

sar-e-mahshar hijab o shauq ka ek marka hoga
unhen apni padi hogi mujhe apni padi hogi

na karte hashr ko ruswa kabhi din ke ujale mein
khabar kya thi teri furqat ki raat itni badi hogi

tajjub kya lage gar aag ai 'simab' sine mein
hazaron dil mein angare bhare the lag gai hogi