bahut shiddat se jo qaem hua tha
wo rishta hum mein shayad jhut ka tha

mohabbat ne akela kar diya hai
main apni zat mein ek qafila tha

meri aaankhon mein barish ki ghutan thi
tumhaare panw baadal chumta tha

tumhaari hi gali ka waqia hai
main pahli bar jab tanha hua tha

khujuron ke darakhton se bhi uncha
mere dil mein tumhaara martaba tha

phir is ke baad raste mar gae the
main bas ek sans lene ko ruka tha