dastar-e-hunar bakhshish-e-darbar nahin hai
sad shukr ki shanon pe ye sar bar nahin hai

ab to ye makan qatl-gahen banne lage hain
achchha hai wo jis ka koi ghar-bar nahin hai

tahris-o-saza se nahin badlenge ye bayan hum
ek bar nahin jab hai to har bar nahin hai

har ek pe khul jae bila farq maraatib
aisa ho to dahliz pe darbar nahin hai

aa jae tawazun mein ye mahaul ki mizan
insaf ke palde mein magar bar nahin hai

zulmat se nikal aaen chamakte hue raste
par mashal-e-ehsas sharar-bar nahin hai

hath aaega kya sahil-e-lab se hamein 'anjum'
jab dil ka samundar hi guhar-bar nahin hai