dawar ne bande bandon ne dawar bana diya
sagar ne qatre qatron ne sagar bana diya

betabiyon ne dil ki ba-ummid-e-sharh-e-shauq
us jaan-nawaz ko bhi sitamgar bana diya

pahli si lazzaten nahin ab dard-e-ishq mein
kyun dil ko main ne zulm ka khugar bana diya

kaifiyat-e-shabab se mazur kuchh hue
kuchh aashiqon ne bhi unhen khud-sar bana diya

'sehr' us nigah-e-mast pe qurban kyun na ho
jis ke karam ne zinda qalandar bana diya