dil mera aaj mere pas nahin
mujh mein kuchh hosh aur hawas nahin

dil lagaya jahan jafa dekhi
kya bala ishq mujh ko ras nahin

pas hai yas gard hai dil ki
aur ab koi aas-pas nahin

aap to apna arz kar le haal
dil hamein tab-e-iltimas nahin

yun khuda chahe to mila de use
wasl ki par hamein to aas nahin

main bhi kuchh ho gaya hun pazhmurda
dil hi mera faqat udas nahin

kya mile tujh se koi dil-dada
aashnai ki tujh mein bas nahin

hai ghafurur-rahim teri zat
sab se hai yas tujh se yas nahin

ek dar hai to dost ka mujh ko
dushmanon se to kuchh hiras nahin

tere khatir ye sab se dur hua
tu bhi tujh ko 'hasan' ka pas nahin