dil se har-dam hamein aawaz-e-buka aati hai
band kanon ko bhi girya ki sada aati hai

dil se hai aankh tak aai asar-e-garmi-e-shauq
ashk hasrat se nigah aabla-pa aati hai

gul hua koi charagh-e-sahari o bulbul
hath malti hui patton se sada aati hai

aaina saf sikandar ko dikhaya tu ne
khub ai khizr tujhe rah bata aati hai

chhu liya dhoke se daman-e-saba tu ne to kiya
ghuncha-e-gul kahin mutthi mein hawa aati hai

jis qadar wasl-e-butan ka tumhein rahta hai firaq
ai 'nasim' utni kabhi yaad-e-khuda aati hai