dua ka phul pada rah gaya hai thaali mein
hawa use bhi uda de na be-khayali mein

wo mujh se mang raha hai mujhe meri khatir
main khud ko dal na dun kasa-e-sawali mein

bas ek mauja-e-baad-e-bahaar guzri thi
piro gai hai mera jism dali dali mein

bikharta jata hai kamre mein cigareton ka dhuan
pada hai khwab koi chae ki pyali mein

diye ke samne wo sar jhukae baithi hai
chamak rahi hai meri raat us ki baali mein