dud-e-dil se hai ye tariki mere gham-khana mein
shama hai ek sozan-e-gum-gashta is kashana mein

main hun wo khisht-e-kuhan muddat se is virane mein
barson masjid mein raha barson raha mai-khana mein

main wo kaifi hun ki pani ho to ban jae sharab
josh-e-kaifiyyat se meri khak ke paimana mein

barq-e-khirman-soz danai hai na-fahmi teri
warna kya kya lahlahate khet hain har dana mein

kis nazakat se hai dekho ittihad-e-husn-o-ishq
zulf wan shane ne khinchi dard hai yan shana mein

wahshat o na-ashnai masti o beganagi
ya teri aankhon mein dekhi ya tere diwana mein

ishq ko nashw-o-numa manzur hai kab warna sabz
tukhm-e-ashk-e-shama ho khakistar-e-parwana mein

hosh ka dawa hai behoshon ko zer-e-asman
khum-nashin misl-e-falatun sab hain is khum-khana mein

pattharon mein thokaren khata hai nahaq sail-e-ab
puchho kya le jaega aa kar mere gham-khana mein

ek patthar pujne ko shaikh-ji kabe gae
'zauq' har but qabil-e-bosa hai is but-khana mein