gham ka hamil na kuchh khushi ka hai
dil giraftar aashiqi ka hai

husn aur mail-e-karam tauba
ye muqaddar kisi kisi ka hai

koi luta gaya sar-e-manzil
tazkira har jagah usi ka hai

wo nazar bhar ke dekhta hi nahin
aks dil mein magar usi ka hai

maut se to mafar nahin hargiz
asl matam to zindagi ka hai

nind aankhon se shauq se jae
ranj furqat mein bekali ka hai

wo 'nazar' ko bacha ke jate hain
waqia ye abhi abhi ka hai