hashiye par kuchh haqiqat kuchh fasana KHwab ka

hashiye par kuchh haqiqat kuchh fasana khwab ka
ek adhura sa hai khaka zindagi ke bab ka
rang sab dhundla gae hain sab lakiren mit gain
aks hai be-pairahan us paikar-e-nayab ka
zarra zarra dasht ka mange hai ab bhi khun-baha
munh chhupae ro raha hai qatra qatra aab ka
sanp ban kar das rahi hain sab tamannaen yahan
karwan aa kar kahan thahra dil-e-be-tab ka
koh-e-tanhai ka 'shahid' zarra zarra tutna
para para ho gaya hai ab jigar simab ka