hath us ke na aaya daman-e-naz
ishq ko sunte hi the dast-daraaz

bait-e-abru hai makhzan-e-asrar
khat hai chehre ka sharh-e-gulshan-e-raaz

dekh kar chashm khun-e-dil rona
kahin ifsha na ho kisi ka raaz

kyun na badnam hun jahan mein main
dil hai bad-khwah chashm hai ghammaz

ek dil ke liye ye fauj-kashi
ishwa-o-naz ghamza-o-andaz

jab bulata ayaz ko mahmud
kuchh na kahta siwae banda-nawaz

jab tak us se niyaz-e-dil na kahun
nahin padhne ka ai 'raza' main namaz