hum se karta hai abas guftar kaj
rast-bazon se na ho ai yar kaj

ishq-e-abru se teri ai kaj-kulah
bandhta hai mah-e-nau dastar kaj

hai tawazo bhi buzurgi ka nishan
kyun na ho piri mein jism-e-zar kaj

kaj-rawi is zulf ka hai khassa
jis tarah hai mar ki raftar kaj

hat yun qatil-jabinon ka laga
jis tarah pahne sanam zunnar kaj

rasti ek baat mein us ki nahin
kaj rawa kaj-maj zaban guftar kaj

qasr-e-tan piri mein jhuk kar kya ruke
gir pade kohna jo ho diwar kaj

ja-e-nazzara hai phirte hain hasin
topiyan rakh kar sar-e-bazar kaj

kaj-numa aaina-e-alam hai 'arsh'
be-sabab tedhe abas hain yar kaj