jo yahan mahw-e-ma-siwa na hua

jo yahan mahw-e-ma-siwa na hua
dur us se kabhi khuda na hua
ahd mein tere zulm kya na hua
khair guzri ki tu khuda na hua
ishq ki ruh ko diya sadma
zindagi mein agar fana hua
yunhi ghut ghat ke mit gaya aakhir
uqda-e-dil kisi se wa na hua
ishq hai ek tilism-e-raaz-e-baqa
mit gaya dil magar fana na hua
kar diya dil ne zinda-e-jawed
qaid-e-hasti se main riha na hua
na mili dad-e-zabt-e-ishq 'aziz'
wo kabhi sabr-azma na hua