khushi ke waqt se daur-e-malal se guzre
teri talash mein hadd-e-khayal se guzre

hamein to asl mein tanha tujhi se milna tha
so ek nazar mein tere khadd-o-khal se guzre

bujhe bujhe se hain ghunchon ki zindagi ke charagh
saba se kah do chaman mein khayal se guzre

tere faqir mohabbat ke ek lamhe mein
hazar bar uruj-o-zawal se guzre

junun ki fitrat-e-ali pe bar hai ai dost
wo bandagi jo maqam-e-sawal se guzre

kahin na daman-e-adab-e-ishq ko chhoda
firaq hi ki tarah hum visal se guzre

dil-o-nazar ko khabar tak nahin hui 'maikash'
kuchh is tarah wo hudud-e-khayal se guzre