libas-e-faqr mein hum ko jo KHaksar mile

libas-e-faqr mein hum ko jo khaksar mile
unhin ke dar pe salatin-e-rozgar mile
wo raaz jis se sulagta raha hai dil kah den
hamare dil sa agar koi raazdar mile
sharab khana-e-chishti mein bhi nazar aae
hamein jo ulfat-e-nanak ke baada-khwar mile
gham-e-jahan-nigari ka safar-e-qayamat tha
har ek zarre ke sine mein kohsar mile
koi bhi duri-e-manzil nahin agar 'darshan'
jahan ko mera junun-e-khirad-shikar mile