miTti qadron mein bhi paband-e-wafa hain hum log

mitti qadron mein bhi paband-e-wafa hain hum log
kisi chalte hue jogi ki sada hain hum log
manzilen paoge hum khak-nashinon ke tufail
hum ne mana ki nishan-e-kaf-e-pa hain hum log
ahl-e-mai-khana hamein dekh ke hanste hain to kya
pir-e-mai-khana ko malum hai kya hain hum log
zindagi qaid ki muddat hai to ye bhi sach hai
apne na-karda gunahon ki saza hain hum log
jo abhi waqt ke gumbad mein hai mahfuz ai 'kaif'
aur palat kar nahin aai wo sada hain hum log