mohabbat bhi hua karti hai dil bhi dil se milta hai
magar phir aadmi ko aadmi mushkil se milta hai

mohabbat jab maza deti hai dil jab dil se milta hai
magar mushkil yahi hai dil se dil mushkil se milta hai

siwae yas kya is sai-e-be-hasil se milta hai
tera dil o sitamgar kab kisi ke dil se milta hai

ajab riqqat-faza hai aakhiri milne ka nazzara
gale lag lag ke bismil khanjar-e-qatil se milta hai

sara-e-dahr mein tanta bandha hai karwanon ka
adam ka ai 'wafa' rasta isi manzil se milta hai