phulon ko sharmsar kiya hai kabhi kabhi
kanton se hum ne pyar kiya hai kabhi kabhi

mauquf chaak-e-jeb-e-gareban hi par nahin
daman bhi tar-tar kiya hai kabhi kabhi

main muztarib raha hun ye sach hai firaq mein
un ko bhi be-qarar kiya hai kabhi kabhi

dil ka diya jala ke khud apne hi khun se
shab shab-bhar intizar kiya hai kabhi kabhi

tanha shab-e-firaq mein tar-e-nafas ke sath
taron ka bhi shumar kiya hai kabhi kabhi

aisa bhi waqt aaya hai aksar hayat mein
sar apna su-e-dar kiya hai kabhi kabhi

sayyaad mere tair-e-dil ne qafas ko bhi
nalon se pur-bahaar kiya hai kabhi kabhi