shikari ne rakkha thikana buland
hadaf past-qamat nishana buland

yahan zulm ki hain kamanden daraaz
kahan tak karen aashiyana buland

tere samne sar-ba-sajda hain log
mera nam hai ghaebana buland

samajh lijiye talkh guzra hai din
agar hai nawa-e-shabana buland

mujhe bolne ki ijazat nahin
meri zat nichi zamana buland

badi tez raftar hai umr ki
khudara na kar taziyana buland

meri chikh bhi kho gai hai 'raza'
hua har taraf se tarana buland