teri nigah ki jab se muawinat na rahi

teri nigah ki jab se muawinat na rahi
kisi ke dil mein meri qadr-o-manzilat na rahi
do ek pal hi koi mujh pe multafit tha magar
tamam-umr kisi se mukhasamat na rahi
raha na qabza tere dil pe to tajjub kya
meri to apne ilaqe pe saltanat na rahi
koi bhi waqia ho pur-sukun hi rahta hai
lahu mein pahli si mauj-emuzahimat na rahi
khabar nahin hai wahan gul khile ki dhul ude
ghazal-e-dasht se meri murasalat na rahi
shah-e-sukhan se tere kaun muttafiq na ho ab
ki mere baad sada-e-mukhalifat na rahi
'salim' lab pe sajata tha jaise lafz wahi
ki us ke baad sukhan mein wo tamkanat na rahi