tujh ko pane ke liye khud se guzar tak jaun
aisi jine ki tamanna hai ki mar tak jaun

ab na shishon pe girun aur na shajar tak jaun
main hun patthar to kisi dast-e-hunar tak jaun

ek dhundlaka hun zara der mein chhat jaunga
main koi raat nahin hun jo sahar tak jaun

jis ke qadmon ke qasidon se hi fursat na mile
kaise us shakhs ki tazim-e-nazar tak jaun

ghar ne sahra mein mujhe chhod diya tha la kar
ab ho sahra ki ijazat to main ghar tak jaun

apne mazlum labon par jo wo rakh le mujh ko
aah ban kar main duaon ke asar tak jaun

ai meri rah koi rah dikha de mujh ko
dhup odhun ki tah-e-shakh-e-shajar tak jaun