yas-o-gham ranj-o-alam tanhaiyan ab ke baras

yas-o-gham ranj-o-alam tanhaiyan ab ke baras
meri qismat mein rahen nakaamiyan ab ke baras
raushni suraj ki aankhon par hai manzar dhup hain
lag rahi hain suraten parchhaiyan ab ke baras
aaine mein dekh kar khud ko na tum hona udas
aainon mein pad gain hain jhaiyan ab ke baras
dekhna hoga sitam ye bhi zaban-bandi ke baad
kat li jaengi sab ki ungliyan ab ke baras
khushk-sali to nahin hai shahr mein 'mahwar' magar
abr kab barsaenge allah-miyan ab ke baras