ye faisla bhi mere dast-e-ba-kamal mein tha

ye faisla bhi mere dast-e-ba-kamal mein tha
jo chhinne mein maza hai wo kab sawal mein tha
kis aaftab ki aahat se shahr jag utha
wagarna main bhi kahin mast apne haal mein tha
tere bayan ne dikhaya jo aaina to khula
ki har shuur mere gosha-e-khayal mein tha
mere safar ke liye roz-o-shab bane hi nahin
tumhin kaho ki main kab qaid-e-mah-o-sal mein tha
ragon mein reg-e-rawan tha gurez-pai ka
lahu asir ajab khwahishon ke jal mein tha
mere gurez ne ahd-e-sitam ko tul diya
ye eqtidar to kab se yunhi zawal mein tha
ajib lams ki lazzat hai meri banhon mein
wahi maza hai jo us khwab ke visal mein tha