yun tod na muddat ki shanasai idhar aa
aa ja meri ruthi hui tanhai idhar aa

mujh ko bhi ye lamhon ka safar chat raha hai
mil bant ke ro len ai mere bhai idhar aa

ai sail-e-rawan-e-abadi zindagi nami
main kaun sa paband hun harjai idhar aa

is nikhat-o-ranai se khae hain kai zakhm
ai tu ki nahin nikhat-o-ranai idhar aa

aasab khinche jate hain ab sham o sahar mein
hone hi ko hai marka-arai idhar aa

sunta hun ki tujh ko bhi zamane se gila hai
mujh ko bhi ye duniya nahin ras aai idhar aa

main rah-numaon mein nahin man meri baat
main bhi hun isi dasht ka saudai idhar aa