zamin ke chand-sitaron ko nind aati hai

zamin ke chand-sitaron ko nind aati hai
hayat-bakhsh bahaaron ko nind aati hai
abhi chaman ka muqaddar chamak nahin sakta
abhi chaman ki bahaaron ko nind aati hai
janaza ashkon ka palkon ke dosh par hai abhi
isi liye to nazaron ko nind aati hai
nizam-e-bazm-e-gulistan badal gaya shayad
chaman ki god mein kharon ko nind aati hai
ab inqilab-e-zamana ki fikr kaun kare
teri nigah ke maron ko nind aati hai
na dub jae kahin nabz-e-zindagi 'maikash'
sahar ka waqt hai taron ko nind aati hai