zindagi ne jhele hain sab azab duniya ke

zindagi ne jhele hain sab azab duniya ke
bas rahe hain aankhon mein phir bhi khwab duniya ke
dil bujhe to tariki dur phir nahin hoti
lakh sar pe aa pahunchen aaftab duniya ke
dasht-e-be-niyazi hai aur main hun ab logo
is jagah nahin aate baryab duniya ke
main ne in hawaon se dastan-e-gham kah di
dekhte rahe hairan sab hijab duniya ke
dekhen chashm-e-hairan kya intikhab karti hai
main kitab-e-tanhai tum nisab duniya ke
hum ne dast-e-duniya par phir bhi ki nahin baiat
jaante the hum tewar hain kharab duniya ke