aab-e-rawan hun rasta kyun na dhundh lun
main tere intizar mein kab tak ruka rahun

tarikiyan muhit hain har anjuman pe aaj
lazim nahin ki main teri mahfil mein hi jalun

ghabra raha hai ji mera tan ke makan mein
majburiyon ke sae mein kab tak pada rahun

nikla hun teri bazm se manind-e-dud-e-shama
chahun bhi ab kabhi to main wapas na aa sukun

milna tera to khair badi baat hai magar
itna bhi kam nahin hai ki main khud ko dhundh lun

khud se bhi koi rabt nahin mera in dinon
tujh se talluqat ki tajrid kya karun

aankhen bujhi bujhi hain to manzar mite mite
ai zindagi kahan se tujhe aab-o-rang dun

'ruhi' ye daur-e-zist musalsal azab hai
khul kar na hans sakun na kabhi khul ke ro sakun