aaj yaadon ne ajab rang bikhere dil mein
muskuraate hain sar-e-sham sawere dil mein

ye tabassum ka ujala ye nigahon ki sahar
log yun bhi to chhupate hain andhere dil mein

surat-e-baad-e-saba qafila-e-yaad aaya
zakhm-dar-zakhm khile phul se mere dil mein

yas ki raat kati aas ka suraj chamka
phir bhi chamke na kisi roz sawere dil mein

ek meri wahshat-e-be-nam pe is tarah na soch
kitni baaten hain jo khatki nahin tere dil mein

dhyan ki shama ki lau tez bhi kar dete hain
aksar auqat teri yaad ke phere dil mein

na mili fursat-e-asaish-e-tabir-e-uruj
ek muddat se hain khwabon ke basere dil mein