aaj yun mujh se mila hai ki khafa ho jaise
us ka ye husn bhi kuchh meri khata ho jaise

wahi mayusi ka aalam wahi naumidi ka rang
zindagi bhi kisi muflis ki dua ho jaise

kabhi khamoshi bhi yun bolti hai pyar ke bol
koi khamoshi mein bhi naghma-sara ho jaise

harf-e-dushnam se yun us ne nawaza hum ko
ye malamat hi mohabbat ka sila ho jaise

is takalluf se sitam hum pe rawa rakhta hai
ye bhi minjumla-e-adab-e-wafa ho jaise

gham-e-ayyam pe yun khush hain tere diwane
gham-e-ayyam bhi ek teri ada ho jaise

bandagi hum ko to aai ki na aai lekin
husn yun ruth gaya hai ki khuda ho jaise