aan pahunche hain ye kahan hum log
ab zamin hain na aasman hum log

kal yaqin bantte the auron mein
ab hain khud se bhi bad-guman hum log

kin hawaon ki zad mein aae hain
ho gae hain dhuan dhuan hum log

chup to pahle bhi jhelte the magar
is qadar kab the be-zaban hum log

kab mayassar koi kinara ho
kab sametenge baadban hum log

ban gae rakh ab na-jaane kyun
the kabhi shoala-e-tapan hum log

hum ko jaana tha kis taraf 'razmi'!
aur kis samt hain rawan hum log