aapko kyun nahin laga patthar

aap ko kyun nahin laga patthar
kaise nakaam ho gaya patthar
ladkiyan khamushi se baithi huin
hae wo bolta hua patthar
tutna thokaron se behtar tha
phul kya soch kar bana patthar
aaine tut kar bikhar bhi gae
aur wo dhundhta raha patthar
mere hisse mein sakhtiyan aain
har kisi ne mujhe kaha patthar
ek hi zindagi mein dusra pyar
ek raste mein dusra patthar
majnun ek aisa raaz hai 'zahra'
jis ne samjha use pada patthar