abas dhunda kiye hum na-khudaon ko safinon mein
wo the aasuda-e-sahil mile sahil-nashinon mein

wo auron ke buton ko todne walon ko dekho to
chhupae phirte hain apne buton ko aastinon mein

hamari bekasi aur na-tawani ka khuda hafiz
ki talwaren hain pinhan rahbaron ki aastinon mein

chhalak jati hai ashk-e-garm ban kar meri aankhon se
thaharti hi nahin sahba-e-dard in aabginon mein

mere ashaar hain aaina-e-soz-e-darun 'bazmi'
jhalakta hai mera khun-e-jigar in aabginon mein