ahd-e-gum-gashta ki nishani hun
ek bhuli hui kahani hun

wo khushi hun jo dard sulgae
aag jis se lage wo pani hun

ek aansu hun chashm-e-ishrat ka
zist ka ranj-e-shadmani hun

apni barbaadiyon pe yaad aaya
kitni aabaadiyon ka bani hun

sina-e-dasht par hun mauj-e-sarab
khushk dariyaon ki rawani hun

aaina-khana-e-zamana mein
aks apna hun apna sani hun

ek tabassum ki aas mein 'rahi'
kab se mahrum-e-shadmani hun