ai ham-daman bhulao na tum yaad-e-raftagan
wamandgan ko hai yahi irshad-e-raftagan

jo ghuncha na-shagufta hi jhad jae shakh se
hai is chaman mein wo dil-e-nashad-e-raftagan

chashm-o-dil-o-jigar ke liye ashk-e-dard-o-dagh
hum pas hai ye tohfa-e-imdad-e-raftagan

is karwan-sara mein ye bang-e-jaras nahin
hai ye sada-e-nala-o-faryaad-e-raftagan

aasida-o-rawinda se puchha bahut 'muhib'
daryaft par na kuchh hui rudad-e-raftagan