aks aaina-khana se alag rakkha hai
wahshat-e-zat ko sahra se alag rakkha hai

khud ko main khud se bhi milne nahin deta hargiz
apni duniya ko bhi duniya se alag rakkha hai

main kahan saat-e-imroz mein rahne wala
main ne har roz ko farda se alag rakkha hai

do mahazon pe abhi marka-arai hai
khema-e-sabr ko dajla se alag rakkha hai

khushk mashkiza-e-hulqum ki nigarani mein
pyas ke khitte ko dariya se alag rakkha hai

wo to kahta hai teri zat mein zam hun lekin
us ne bhi khud ko bas ek la se alag rakkha hai

kitna aasan hai ye jada-e-dushwar bhi ab
apna har naqsh kaf-e-pa se alag rakkha hai

main 'yagana' ka taraf-dar nahin hun 'shahid'
is liye mir ko mirza se alag rakkha hai