andhere ghar mein charaghon se kuchh na kaam liya
ki apne aap se yun hum ne intiqam liya

tumhaare shahr se saughat aur kya milti
kisi se pyas li main ne kisi se jam liya

mere zawal ki wo saaten rahi hongi
tumhein pukar ke daman kisi ka tham liya

shajar shajar meri parwaz thi hawa ki tarah
khuli faza mein mujhe kis ne zer-e-dam liya

ajib chiz hai 'shahid' ye khud-shanasi bhi
salib-o-dar pe bhi main ne apna nam liya