aur honge wo jinhen zabt ka dawa hoga
har bun-e-mu se yahan zikr kisi ka hoga

husn kyun ishq ki tashhir pe shadan hai bahut
ishq ruswa hai to kya husn na ruswa hoga

ashk ban ban ke wo aankhon se tapak jaegi
kya khabar thi ki ye anjam-e-tamanna hoga

kahin ruswa na kare hairat-e-didar mujhe
aaj wo jalwa-e-mastur huwaida hoga

dil hi aashob-e-zamana ka sabab hai 'simab'
dil na hoga to koi hashr na barpa hoga