baiTha nahin hun saya-e-diwar dekh kar

baitha nahin hun saya-e-diwar dekh kar
thahra hua hun waqt ki raftar dekh kar
ham-mashrabi ki sharm gawara na ho saki
khud chhod di hai shaikh ko mai-khwar dekh kar
kya jaane bahr-e-ishq mein kitne hue hain gharq
sahil se sath-e-ab ko hamwar dekh kar
hain aaj tak nigah mein haalanki aaj tak
dekha na phir kabhi unhen ek bar dekh kar
'bismil' tum aaj rote ho anjam-e-ishq ko
hum kal samajh gae the kuchh aasar dekh kar
Please share if you liked this!!!