banda-e-ishq hun juz yar mujhe kaam nahin
khwahish-e-nang nahin kuchh hawas-e-nam nahin

mazhab-e-ishq ka ye dhang nirala dekha
kuchh wahan tazkira-e-kufr aur islam nahin

ishq ko jaanta hun din-o-iman apna
ghair mashuq parasti mujhe kuchh kaam nahin

kaba-e-jaan hai mera kucha-e-jaanan yaro
sajda-e-dair-o-haram se mujhe kuchh kaam nahin

said-e-murgh-e-dil-e-ashiq liye ai dilbar
khal hai dana aur ye zulf kam az dam nahin

dard-e-dil ne hamein kya kya hai chakhai lazzat
is liye dil ko mere khwahish-e-aram nahin

mazhab-e-ishq mein aa kar ke hamin ai 'asim'
shah khadim ke siwa aur se kuchh kaam nahin