bujh kar bhi shoala dam-e-hawa mein asir hai
qaem abhi faza mein dhuen ki lakir hai

guzra hun us ke dar se to kuchh mang lun magar
kashkol be-talab hai sada be-faqir hai

jo chahe achchhe damon mein us ko kharid le
wo aadmi bura nahin par be-zamir hai

dil par lagi hai sab ke wahi mohr barf ki
zahir mein garm-joshi-e-dast-e-safir hai

dhunde se aadmi nahin milta yahan pe 'zeb'
yun is dayar-e-bahr mein gauhar kasir hai