dekh us ko khwab mein jab aankh khul jati hai subh
kya kahun main kya qayamat mujh pe tab lati hai subh

shama jab majlis se mah-ruon ki leti hai utha
kya kahun kya kya sunen us waqt dikhlati hai subh

jis ka gora rang ho wo raat ko khilta hai khub
raushnai shama ki phiki nazar aati hai subh

pas tu sota hai chanchal par gale lagta nahin
minnaten karte hi sari raat ho jati hai subh

nind se uthta hai 'taban' jab mera khurshid-ru
dekh us ke munh ke tain sharma ke chhup jati hai subh