dekhiyo us ki zara aankh dikhane ka maza
chitwanon mein hai bhara sare zamane ka maza
kis maze se hai ayan duzdi-e-dil hai zalim
lun chara kyunki tere aankh churane ka maza
lazzat-e-wasl koi puchhe to pi jata hun
kah ke honton hi mein honton ke milane ka maza
kya tere mai-kash-e-ulfat ka ye kaifiyyat hai
dard-e-dil kar ke bayan rone rulane ka maza
dast-bar-dil ho uthata hun ajab lazzat-e-dard
yaad kar hijr mein wo hath badhane ka maza
jo khamoshi mein hai lazzat nahin goyai mein
be-khudi sa hai kahan aap mein aane ka maza
us ke ladne ke bhi sadqe ki nazar aata hai
ain ranjish mein ajab aankh ladane ka maza
khwab-o-khur se tere bimar ko kya kaam ki hai
lazzat-e-khwab na kuchh is ko na khane ka maza
yaad aata hai to jata hun khuda jaane kahan
wo lagawat ki nigahon mein bulane ka maza
kya kahun wasl ki shab le ke balaen us ki
kya uthata hun main zanu pe bithane ka maza
main to phir aap mein rahta nahin dil se puchho
aage phir bhench ke chhati se lagane ka maza
dar pe us parda-nashin ke ho to ba-saut-e-buland
sher us waqt hai 'jurat' se padhane ka maza