dil-e-mayus mein wo shorishen barpa nahin hotin
umiden is qadar tutin ki ab paida nahin hotin

meri betabiyan bhi juzw hain ek meri hasti ki
ye zahir hai ki maujen kharij az dariya nahin hotin

wahi pariyan hain ab bhi raja indar ke akhade mein
magar shahzada-e-gulfam par shaida nahin hotin

yahan ki auraton ko ilm ki parwa nahin be-shak
magar ye shauharon se apne be-parwa nahin hotin

talluq dil ka kya baqi main rakkhun bazm-e-duniya se
wo dilkash suraten ab anjuman-ara nahin hotin

hua hun is qadar afsurda rang-e-bagh-e-hasti se
hawaen fasl-e-gul ki bhi nashat-afza nahin hotin

qaza ke samne be-kar hote hain hawas 'akbar'
khuli hoti hain go aankhen magar bina nahin hotin